नगर प्रहरी प्रमुखले नै नगरपालिकाको सामान चोर्न खोजेपछि जागिर चट!
बेल्टार, चैत ८ – उदयपुरको चौदण्डीगढी नगरपालिकामा फेरि अर्को काण्ड बाहिर आएको छ। नगर प्रहरी प्रमुख गणेश कार्की स्वयं नगरपालिकाको सामान चोरी गर्न खोजेको आरोपमा जागिरबाट निकालिएका छन्।
स्ववियु निर्वाचनको दिन, जब सबैको ध्यान विद्यार्थी राजनीतितर्फ थियो, कार्कीले कोभिड अस्पतालमा रहेको तीन बोरा मास्क र PPE सेट चोरी गरेर बेच्ने प्रयास गरे। उनले ती सामग्री नगरपालिकाको पिकअप भ्यानमा लोड गरिरहेका बेला नगर प्रमुख कालुमान लामाले रंगेहात समाते।
नगर प्रमुखको हस्तक्षेपपछि तत्काल स्पष्टीकरण माग्दा कार्कीले आफ्नो गल्ती स्वीकार गरे, जसपछि उनले ‘स्वइच्छिक राजीनामा’ दिन बाध्य भए। प्रमुख प्रशासकीय अधिकृत काजिमान राईका अनुसार, कार्कीले ती सामग्री कहाँ र कसलाई बेच्न खोजेका थिए भन्ने खुलाइएको छैन।
गणेश कार्की नेपाल प्रहरीबाट पेन्सन पाएर नगर प्रहरी प्रमुख बनेका थिए। चौदण्डीगढी–१० हडियाका स्थायी बासिन्दा कार्की हाल सुनसरीको इटहरीमा बस्दै आएका छन्।
नगरपालिकाले अहिले नगर प्रहरीको इञ्चार्ज कपिल विष्टलाई तोकेको छ। नगर प्रमुख कालुमान लामा भने यस विषयमा कुनै प्रतिक्रिया दिन तयार छैनन्।
यस्तो अवस्थामा प्रश्न उठ्छ— सरकारी सम्पत्तिको सुरक्षामा खटाइएका अधिकारी नै लुटपाटमा संलग्न भए भने जनताले कसलाई विश्वास गर्ने?