“ हराएका सपनाहरु”
️प्रतिमा कार्की
हराएका छन्,
यहिं कतै
मेरा निर्दोश सपनाहरु
कतै सागरका लहरहरुमा
कतै रहरका शहरहरुमा
मरेका त अझै छैनन्
भरोशाको खम्बाहरु मजबुत् छन्।
तै पनि धमिलिएका छन्
शुभ बिहानीका प्रहरहरुमा।
तारा झैं छरिएका थिए
निला गगनमा, टिलपिल टिल्पिल
हेर्दा हेर्दै मधुरिएका छन्
सांघुरिएका छन्,
पर्वतिय डगरहरुमा।
बेजोड मेरा सपनाहरु
कतै कठाङ्ग्रिए, कतै पग्लिए
रेगिस्तानी नगरहरुमा।
निर्दोश मेरा सपनाहरु
शरदका जून झैं हांसेका थिए
बषन्तका फूल झैं फक्रिएका थिए
परन्तु, हिजोआज
डराएका छन्,थर्थराएका छन्
अग्रिम सूनामीका हल्लाहरुले झैं
यहाँका हरेक नजरहरुमा।
थाहा थिएन मलाई
यहाँ सपनाहरु बिक्दा रहेछन्
बेचिंदा रहेछन्
लिलाम् बढाबढको सुचना बिनै
त्यही सपनाका बजारहरुमा।
सायद, त्यसैले
गुमनाम छन् मेरा सपनाहरु
बद्नाम छन् मेरा सपनाहरु
भबितब्यका जहरहरुमा।
हराएका छन्
मेरा निर्दोश सपनाहरु
यहिं कतै
सागरका लहरहरुमा
कतै रहरका शहरहरुमा…
️ प्रतिमा कार्की
