आवाज मिडिया सम्बादाता
उदयपुर चौदण्डिगढी
२०८२/०९/१२
उदयपुरमा ७६३ केजी गाँजासहित दुई जना पक्राउ।।
उदयपुर जिल्लाको चौदण्डीगढी नगरपालिका–३ पैतालिस चौकबाट ठूलो परिमाणमा लागू औषध गाँजा बरामद गरिएको छ। जिल्ला प्रहरी कार्यालय उदयपुर र लागू औषध नियन्त्रण ब्युरो विराटनगरको संयुक्त टोलीले २०८२ पुस १२ गते राति १२:३० बजे विशेष सूचनाको आधारमा कारबाही गरेको हो।
रामपुरबाट गाईघाटतर्फ आउँदै गरेको को.१ ज ३४५६ नम्बरको बोलेरो गाडी जाँच गर्दा ७६३.७६ केजी प्रतिबन्धित लागू औषध गाँजा फेला परेको प्रहरीले जनाएको छ। सो क्रममा गाडी चालक बेलका–६ का २३ वर्षीय रविन कुमार राई र सोही गाडीमा सवार बेलका–९ का २८ वर्षीय रामबहादुर राई पक्राउ परेका छन्।
बरामद गरिएको गाँजा र बोलेरो गाडीसहित पक्राउ परेका दुवै जनालाई इलाका प्रहरी कार्यालय बेल्टार, उदयपुरमा राखी थप अनुसन्धान भइरहेको प्रहरीले जानकारी दिएको छ।
