लमजुङ, ७ जेठ ।
लमजुङको दुराडाँडास्थित प्रतिष्ठित सर्वोदय माध्यमिक विद्यालयका दुई जना शिक्षक पदोन्नति (बढुवा) हुनुभएको छ। विद्यालयमा लामो समयदेखि अध्यापन गराउँदै आउनुभएका शिक्षकद्वय देविभक्त सेढाइ र शुकराम विश्वकर्माको पदोन्नति भएको हो।
आवाज मिडियाका संवाददाता तथा सोही विद्यालयका प्रशिक्षक दीपक घर्तीका अनुसार शिक्षक देविभक्त सेढाइ माध्यमिक द्वितीय श्रेणीमा र शुकराम विश्वकर्मा निम्न माध्यमिक द्वितीय श्रेणीमा बढुवा हुनुभएको हो। शिक्षा सेवामा उहाँहरूले पुर्याउनुभएको निरन्तर योगदान र कार्यक्षमताको कदरस्वरूप यो पदोन्नति भएको संवाददाता घर्तीले जानकारी दिनुभयो।
चौतर्फी खुसीयाली र बधाईको ओइरो
शिक्षकद्वयको यो सफलताप्रति सर्वोदय माध्यमिक विद्यालय परिवार, विद्यालय व्यवस्थापन समिति, अभिभावक तथा स्थानीयवासीले ठुलो खुसी व्यक्त गरेका छन्। लामो समयदेखि ग्रामीण क्षेत्रको शिक्षाको गुणस्तर सुधार्न समर्पित शिक्षकहरूको यो प्रगति सम्पूर्ण शिक्षा क्षेत्र र गाउँकै लागि प्रेरणादायी भएको स्थानीयहरूको भनाइ छ।
विद्यालय परिवारले शिक्षकद्वयको सुखद भविष्यको कामना गर्दै बधाई ज्ञापन गरेको छ। संवाददाता घर्तीका अनुसार विद्यालय परिवारले उहाँहरूको सफल कार्यकाल, उज्ज्वल भविष्य तथा आगामी दिनमा शैक्षिक क्षेत्रमा थप प्रगतिका लागि हार्दिक शुभकामना समेत व्यक्त गरेको छ।
